- Өте бай болу үшін не істеу керек?

- Қанағатшыл болған кісі адамдардың ең байы болады.

- Кім ең қайырлы?

- Адамдардың ең қайырлысы – адамдарға пайдалы болғаны.

-Ең әділетті кім?

- Өзіне қалаған нәрсесін өзге адамдарға да қалаған кісі – адамдардың ең әділеттісі.

- Аллаһтың ең таңдаулы құлы болу үшін не істеу керек?

- Аллаһты көп зікір етіп, есінен шығармаған кісі – Аллаһтың ең таңдаулы құлы.

- Ихсан иесі болу үшін не істеу керек?

- Аллаһқа Оны көріп тұрғандай ғибадат еткен кісі ихсан иесі болады.

- Кемел иманға қолжеткізу үшін не істеу керек?

- Көркем мінезді болу қажет.

- Қиямет күні нұрға бөленген күйде қайта тірілу үшін не істеу керек?

- Ешкімге зұлымдық жасамаған кісі нұрға бөленіп тіріледі.

- Күнәлардың азаюы үшін не істеу керек?

- Истиғфар етіп, күнәлардың кешірілуін тілеп Аллаһқа жалбарынған кісінің күнәлары азаяды.

- Ізгі кісі болу үшін не істеу керек?

- Аллаһқа құлдарын шағымданбайтын адам ізгілікті болады.

- Ризықтың мол болуы үшін не істеу керек?

- Тазалықты сақтайтын, таза жүретін адамның ризығы мол болады.

- Аллаһу та'аланың және пайғамбарымыздың бізді жақсы көруі үшін не істеуіміз керек?

- Олардың бізді жақсы көруі үшін олардың сүйгендерін жақсы көру, ал жақтырмағандарын жақсы көрмеу керек.

- Аллаһтың ашуынан құтылу үшін не істеу керек?

- Дүниелік үшін ешкімге ашуланбайтын кісі Аллаһтың ашуынан құтылады.

- Дұғалардың қабыл болуы үшін не істеу керек?

- Харамдардан сақтанып жүретін адамның дұғалары қабыл болады.

- Өзгелердің алдында масқара болғысы келмейтін кісінің не істеуі керек?

- Намысын қорғап жүрген, арлы кісі адамдардың алдында масқара болмайды.

- Кемшіліктеріміздің жасырын қалуы үшін не істеу керек?

- Дін бауырларының кемшіліктерін жасырған кісінің кемшіліктерін Аллаһ жасырады.

- Күнәлардың кешірілуіне не себеп?

- Көз жасы мен аурулар.

- Қай жақсылықтың маңызы зор?

- Көркем мінез, қарапайымдылық, бәле-жалаға сабыр ету және тағдырға разы болу...

- Ең үлкен күнә қандай?

- Жаман мінез.

(Берілген жауаптардың барлығы – хадис шәрифтер).